Ma laga yaabaa in dad sabool ah ay hormariyaan dal la daala dhacayay saboolnimo, jahli, iyo nidaam daro, se macquul ma tahay in 8 sano kaliya ay umadi ku gaarto isku filnaasho dhan walba ah, mana dhici kartaa in horseedaha guushaasi uu yahay hogaamiye aan nasiib u yeelan inuu dhamaysto waxbarashadiisii hoose saboolnimo daraadeed, Maqaalkeena maanta waxaan ku soo qaadanaynaa mid kamid ah guulihii ugu xiisaha badnaa ee umadi gaarto qarnigan

Brazil – waxaa lagu tiriyaa dalka Brazil mid kamid ah dalalka ilaahay ku manaystay dhulalka baaxada wayn iyo khayraadka dabiiciga ah, taasoo sabab u ahayd inay noqoto dhul ay u soo tartamaan gumaystayaashii yurub iyadoo 3 qarni uu ka talinayay gumaystihii burtugesku, sanadkii 1827 oo uu ka baxayna wuxuu uga tagay maamulka iyo hogaanka dalkaasi kuwo isaga ka amar qaadanayay halka dhinaca kalena uu ka tagay malaayiin qof oo noloshoodu ay ka hoosayso diilinta casaanka ah ee saboolnimada.

Sanadkii 1889 ayay ahayd markii ugu horaysay ee dhidibada loo taagay nidaamka maamul ee dalkaasi laakiin Nasiib daro ma noqon mid meesha ka saara baahidii xiligaasi taaganayd ee aqoon darida iyo saboolnimadu ugu horaysay, Maamulo salka ku hayay nidaam ciidan iyo awood kali talisnimo, Dagaalo sokeeye, aafooyin dhaqaale oo aan dhamaad lahayn, iyo ganacsato dhiig miirato ah oo ay aafooyinku u noqdeen wado hantidoodu ku kobacdo ayay Brazil la il darnayd xiligaasi.

Horumarkii Dhiciska ahaa…

Sanadkii 1930 waxaa afgambi ciidan kula wareegay hogaanka dalkaasi - getulio vargas – askarigan ayaa xambarsanaa fikir uu isbadal horumar ku salaysani saldhig u yahay, isla markiiba wuxuu bilaabay dhisida barazil cusub oo ku tiirsan wax soo saarkeeda, wuxuuna yagleelay warshado u suuq geeya wax soo saarka Brazil dalka dibadiisa, laakiin nasiib daro vargas oo lawgu magac daray aabihii saboolada kuma guulaysan inuu ka miro dhaliyo isbadalkii uu doonayay, 1956kii Vargas wuu baneeyay kursigii waxaana badalay - Juscelino Kubitschek – juscelino wuxuu ku guulaystay mudo aad u yar inuu u badalo barazil dal leh awood wax soo saar oo aad u wayn, xiligiisi waxay noqotay barazil dal soo saara gawaadhida, maraakiibta waaweyn iyo warshadaynta alaabaha culus, waxaa la sameeyay wadooyinkii iyo buundooyinkii ugu badnaa ee dalka laga sameeyo, wuxuu u badalay tamarta korontada dalkiisa in laga dhaliyo biyaha, sidoo kalena wuxuu ka raray caasimadii magaalada reo de jenerio oo saarnay xeebta dhacdayna koonaha shishe ee barazil isagoo u badalay magaalada barazilia ee dhacda bartamaha dalka barazil si horumarka iyo dib u dhiska dalku uu wada gaaro dhamaan daafaha brazil, 5 sano oo uu juscelino hogaaminayay dalka barazil ayay barazil ku talaabsatay horumaro aad u baxad wayn iyadoo mudadaasi ku xaqiijisay kobac sanadeed lagu qiyaasay 7.9%, wax soo saarka dalkaasina wuxuu kobcay 80%, halka warshadayntuna ay samaysay horumar lagu qiyaasay 76%, laakiin horumarkaasi buuraha le eg ma  noqon mid sii taagnaada waxayna ku soo baraarugeen reer barazil horumar mala awaal ah oo ay ku naaloonayeen, marka laga yimaado dhaqaalaha badan ee ku baxay dhisida caasimada cusub waxay xooga saartay xukuumadii juscelino soo saarka alaabo qaali ah, saboolnimada iyo faqriga ka jiray dalka xiligaasina wuxuu sabab u noqday inuu yaraado dalabkii iibku, waxaana kobcay daymihii lagu lahaa dawlada 87 million oo lagu lahaa dalka intaanu juscelinio la wareegin hogaanka ayay tiradu kor ugu kacday 297 million oo doolar 5tii sano ee uu hayay maamulka, arintani ayaa sabab u ahayd bilowga carada shacabka iyagoo bilaabay mudaaharadyo lawga soo hor jeedo maamulkii juscelino hogaaminyay, juscelinio gadaashii barazil ma helin hogaamiye ka soo kiciya godka mugdiga ah ee uu ku jiray dadkeedu, xukuumad walboo timaada waxay ku fashilmaysay inay horay u qaado talaabo, afgambiyo aan dhamaad lahayn, saboolnimo joogto ah, sicir barar gaary 3000%, lacag aan qiime lahayn, jahli, nadaafad daro, siyaasiyiin calooshood u shaqystayaal ah, ganacsato dhiig miirato ah iyo dayn 93 bilion ah ayay barazil la daala dhacaysay wuxuuna u qaybsamay dadkii barazil labo dabaqad dabaqad sabool ah oo aan xitaa nolol maalmeedkeeda heli karin iyo dabaqad maal qabeeno ah oo aan gaarin 10%.

Bilowgii Rajada:

Horay ayaa loo yiri waydii tijaabiyaha ha waydiin dhakhtarka, si ay uga baxdo brazil godka dheer ee mugdiga ah ee ay ku jirtay qarniyo badan waxaa khasab noqotay in la helo qof soo arkay nolosha dhabta ah ee ay ku noolyihiin dadka saboolka ah oo ah aqlabiyada dadka ku nool dalkaasi, waxa uuna shacabku doortay inuu noqdo qofkaasi lula da silva, wuxuu kamid ahaa maalaayiinta dhalinyarada ah ee ku soo koray duruufaha nololeed ee saboolnimada, ma helin awood dhaqaale oo uu wax ku barto wuxuuna ka tagay isagoon dhamayn iskool hoose, wuxuu bilaabay inuu shaqeeyo markii uu jiray 10 sano isagoo iibin jiray fuulka galina ahaa baalashle, dhalinyarnimadiisiina wuxuu ka shaqayn jiray warshad lagu sameeyo biraha taasoo sabab u ahayd inuu waayo far kamid ah faraha gacantiisa, lula da silva markii uu la wareegay hogaanka barazil wuxuu ogaaday inaanay barazil haysan lacag la,aan iyo khayraad la,aan balse khaladku uu ka jiro qaabkii loo maarayn lahaa khayraadkaas iyo dhaqaalahaa, silva wuxuu bilaabay inuu ahmiyada dawlada u qaybiyo dadka saboolka ah iyo dadka maal qabeenada ahba halka xukuumadihii ka horeeyay ay xooga saari jireen kaliya maal qabeenada oo ay aaminsanaayeen inay yihiin kuwa kaliya ee kor u qaadi kara dhaqaalaha dalka.
Wuxuu adeegsaday qaacido ah kobci dakhliga dadka saboolka ah si ay iyaguna u kobciyaan dakhliga dalka, wuxuu bilaabay inuu siiyo dadka saboolka ah mushaar bile ah taas badalkeedana waxaa lagu khasbay reer walba oo ay dawladu mushaar siiso inay ilmahooda geeyaan iskoolada, sidoo kale wuxuu sameeyay iskoolo tababaro, jaamacado iyo macaahid laga furay dhamaan daafaha brazil, wuxuuna ku guulaystay inuu abuuro 20 milion oo fursad shaqo ah, talaabadani waxay sababtay inay kobocdo awoodii iibsasho ee dadka dabaqada hoose una badnaayeen baraziiliyiintu taasoo sabab u noqotay inuu kobco wax soo saarku, sidoo kale waxay meesha ka saartay jaahligii iyadoo dadka barazil oo lagu tirin jiray dal kamid ah dalalka ugu hooseeya aqoonta ka dhigtay dalka ugu horeeya latin ameerika aqoon ahaan, 8 sano oo uu joogay lula da silva maamulka dalkaasi barazil waxay bixisay dhamaan daymihii lagu lahaa oo ka badanaa 93 billion oo doolar iyadoona noqtay mid kamid ah dalalka siiya bankiga aduunka daymaha ugu badan, shaqo la,aanta oo ahayd 9.2% waxay hoos ugu dhacday 6.2%, wax dhoofinta oo ahayd 60.3 bilion ay kor ugu kacday 152.9 billion, halka lacagta kaydka ahna ay kor uga kacday 38 bilion iyadoo gaartay mudadaasi 275 billion oo doolar, 28 million oo qofna waxay kor uga soo keceen khadka saboolnimada, halka 63% ay kobocday aadida iskooladu, maalgashiga dhismuhuna 8daa sano wuxuu kor ugu kacay 63.2 billion oo doolar halka uu ahaa markii hore 7 bilion oo doolar.

8 sano kaliya ayaa ku filnayd lula da silva si uu dal la il darnaa saboolnimo ugu badalo dalka 6aad ee ugu dhaqaalaha badan aduunka.
Qofna Ma Awoodo Gurashada Miro aanu Beeran

8 sano kadib lula da silva wuxuu ku wareejiyay talada dalkaas delma rosef oo ay shacabku u doorteen inay badasho booskiisa waxaana soo idlaaday 8 sano oo uu lula da silva ku qoray magaciisa qaluubta reer barazil barayna caalamka inaanay jirin umad aan isbadali karin saboolnimada iyo jahliguna ay yihiin aafooyin laga talaabsan karo hadii la helo go,aan iyo hogaan, Hadaba Ma heli doonaa hadii aan nahay somali hogaamiye sida lula da silva xaliya dhamaan dhibaatooyinka aan dhex dabaalanayno.
Ugu Dambayn Ogow Akhriste in Qof walbaa gaari karo Meesha uu u Hanqal Taagayo hadii uu la yimaado Dulqaad iyo Shaqo Joogto ah, Duruuf walboo ku haysatana awood uma lahan inay kuu diido gaarida meesha aad rabto