Wali ma ku tiri naftaadu Noloshu way adag tahay?
Ma is tiri guul ma gaari kartid adigoo eegaya duruufaha sida arxan darada ah kaaga soo weeraray dhan walba?

Ma is tiri qaad talaabo oo dib ma u noqotay adigoo ka Cabsanaya Guul Daro?
Ma Eegtay Hareerahaaga oo ma ka wayday wehel aad weheshato inta aad ku jirtid hayaanka dheer ee Nolosha?

Hadii ay jawaabtaadu haa tahay akhriste kaalay aan wada akhrisanee sheekada Mid kamid ah dadka ugu saamaynta badan dunida xiligan ahaana mar aan fogayn qof ku noolaa saboolnimo dhibna ay ku ahayd helida nolol maalmeedkiisa, kuna noolaa nolol qaxootinimo iyo duruuf aan dhamaad lahayn kulansatay, halka lagu tiriyo maanta mid kamid ah dadka ugu hodonsan caalmka.

Jan Koom 24kii faberury 1976 ayuu ku dhashay dalka ukrain, wuxuuna ka dhashay qoys sabool ah oo asal ahaan ka soo jeeda dalkaas. 

Jan koom markii uu 16 sano jirsaday isaga iyo hooyadii waxay u baqooleen dalka maraykanka iyagoo ka baqoolay nolosha adag ee ay ku noolaayeen, Laakiin nasiib daro kama helin maraykanka nolol dhaanta tii ay ku noolaayeen taasoo ku kaliftay jaan koom inuu ka shaqeeyo makhaayad oo uu Nadiifin Jiray, halka hooyadiina ay ka shaqayn jirtay meel lagu hayo caruurta, sidoo kale jan iyo hooyadii waxay ka qaadan jireen dawlada lacag yar oo lagu kabi jiray nolosha dadka qaxootiga ah ee ku nool dalka maraykanka.

Jaan koom Markii uu 18 sano jirsaday wuxuu bilaabay inuu barto samaynta applicationda mobilada laakiin duruufta nololeed ee uu ku noolaa uma saamixi jirin inuu soo iibsado buug uu ka barto, taasoo sababtay inuu soo kiraysto buugaagta kadib marka uu akhrisatana uu dib ugu celiyo maktabada, mudo yar kadib jan koom wuxuu ku biiray jaamacada San José State University, sidoo kalena si uu jaamacada isaga bixiyo una helo nolol maalmeedkiisa wuxuu galin ka shaqyn jiray waardiyanimo taasoo siisay awood uu ku sii wadi karo waxbarashadiisa.

Bilowgii Isbadalka:



Jaan koom Mudo yar kadib bilowgiisii jaamacada wuxuu shaqo ka helay Shirkada Yaahoo taasoo sababtay inuu joojiyo waxbarashadii si uu waqti fiican ugu helo shaqadiisaa cusub, mudadii uu ka shaqynayay yaahoo waxay isbarteen Brain aktoom oo mudo yar gudaheed ay ku noqdeen saaxiibo aad isugu dhow, jaan koom iyo barain aktoom oo ka cabsi qabay mustaqblka shaqo ee shirkada yaahoo ayaa go'aan ku gaaray inay isaga tagaan yaahoo oo ay aaminsanaayeen inaanay mudo dheer sii jirayn shaqana u raadsadaan shirkada facebook oo xiligaasi ay ahayd markii ay sida xawliga ah kor ugu soo kacaysay laakiin nasiib daro Codsigoodii shaqo way ka diiday facebook.

Curashadii Whtsapp:



Bilowgii sanadkii 2009kii ayuu jaan koom soo iibsaday markiisii ugu horaysay mobaile I phone ah, xiligaasi applicationada mobiladu uma badnayn sida maanta oo kale taasoo tustay jaan koom Fursad uu Ku abuuri karo application cusub.

Jaan koom waxaa markiiba ku soo dhacay maskaxdiisa application xal u noqda lacagta qaaliga ah ee ku hadalka telefoonka gaar ahaana ku hadalka dibada oo uu dhibaato wajihi jiray marka uu la hadlayo aabihii oo ukrain joogay.

Wuxuu bilaabay jaan koom oo caawimaad ka helaya saaxiibkii brain aktoom yagleelida application cusub oo ay sumad uga dhigeen whtsapp, Labo sano gudaheed waxay gaareen smsyada la isku dhaafsaday whtsapp 95 billion oo sms, sidoo kale 5tii sano ee ugu horaysay waxay gaareen whtsapp Dadka ku xiran 950 million oo qof taasoo ka dhigtay mid kamid ah applicationada ugu isticmaalka badan aduunka.

2014kii 5 sano uun kadib markii la yagleelay whtsapp ayay isla shirkadii diiday inay shaqaalaysiiso jaan koom ee facebook kula wareegtay lacag lagu qiyaasay 19 billion oo doolar, wuxuuna ku saxiixay hishiiska ay ku kala ibsanayeen isla goobtii uu ka qaadan jiray lacagta cayrta xiligii ay qaxootinimada ku soo galeen maraykanka isaga iyo hooyadii.

Maanta jaan koom wuxuu kamid yahay dadka ugu hantida badan aduunka halka uu shalay ahaa sabool dalkiisii baahi uga soo cararay. Hadaba ma is waydiisay Akhriste adiga maxaa kaa hortaagan inaad gaadho meesha aad hayaanka u tahay?
Ma dadkaa diiday fikradahaaga? 
Dad badan oo maanta guul ka gaadhay nolosha raadna ku reebay aduunka ayaa la diiday fikradahooda, Tusaale noolna waxaa inawgu filan Nabi Maxamed SCW bilowgii waa la diiday dacwadiisa laakiin ugu dambayn waxay noqotay dacwadiisu mid kulmisa balaayiin qof oo ku kala sugan daafaha dunidan.

Ugu dambayn ogsoonoow akhriste in aaminaada naftaadu ay tahay tan kugu horseedaysa dhabada aad hayaanka u tahay, iska dhaga tir qof walboo isku dayaya inuu curyaamiyo hayaankaaga hana ahaato guushu tan kaliya ee aad u hanqal taagaysid.